Sexta-Feira

Grupu Feto Tais Tradisionál Senti Ameasadu Ho Tais Imprime

Grupu Feto Tais Tradisionál Senti Ameasadu Ho Tais Imprime

Diretór Jerál Indústria no Kooperativa, MKIA, António da Costa.

DILI (ANTIL)- Rosalina da Costa, Koordenadór Sentru Kooperativa Bobometo ba ANTIL iha Bebonuk, Segunda (12/12/2016) informa, iha planu atu halo protesta ba tais printing (imprensaun), tanba sai ameasa ida no bele hamate grupu feto soru tais sira-nia atividade.

Asaun ne’e sei ladireitamente halo, maibé liuhusi Ministériu Komérsiu, Indústria no Ambiente (MKIA). “Ami hato’o beibeik ona ba Komérsiu Indústria no hateten sira iha ona hanoin,  tanba sira mós hanoin inan-feton sira ne’ebé durante ne’e kria ona atividade no produtu no tama iha 2017 sei hadi’a”, Rosalina relata.

Nia hatutan, tais Timor-Leste ne’ebé soru ho liman rasik diferensa ho tais ne’ebé prodús husi mákina. “Sé sira uza ona mákina halo buat oioin, ami-nia tais sira ne’ebé mak ami forma ona grupu to’o iha foho ne’ebá lakleur sei lakon tanba ema halai liu ba ida ne’e tanba folin lahanesan ho tais orijinál”.

Nune’e, grupu feto ne’e husu liuliu ba Governu ba buat ne’ebé mak orijinál labele tama ba iha mákina tanba lahanesan ho soru. “Mákina sei estraga tais ne’ebé ita soru rasik, nia folin lahanesan no ema gosta liu ba mákina tanba nia folin baratu. Entaun tais ne’ebé ami halo, sei labele fa’an tanba nia folin karun.Nune’e, ami labele selu ema lori tais ne’ebé mak ami fa’an, tanba ema labele hola ami-nia tais”, Rosalina dehan.

Nia husu ba Governu, kuandu halo buat ruma ne’ebé lakona tenke taka. “Hanesan ho Xina sira ne’ebé agora fa’an sasán.  Sira mai foti ita-nia tais lori lalais ba hatama mákina, mai fa’an fali”, nia hatete.

Rosalina haktuir, daudaun ne’e sira halo tais ba karteira, pasta ema ladún haree ona tanba karun. “Xina nia sasán dolar 4 no 5 ne’e feitu kedan, ita lalakon”.

Enkuantu ba kompañia Raya Tex, ne’ebé halo ona Tais Printing, tuir Rosalina, tenke serbisu hamutuk ho grupu ki’ik sira ne’e. “Serbisu hamutuk ho ami para sosa husi ami hodi suku sai vestida, pasta. Labele foti husi rai-liur, tanba hanesan de’it. Mai promove iha ne’e, ita sosa, maibé sira halo moris iha rai-liur. Sé sira halo iha ne’e, halo ami grupu ki’ik sira moris, ami mós kontente. Produtu ne’e ami mak prodúz no sira promove iha rai-liur,” nia dehan tan

Diretór Jerál Indústria no Kooperativa, António da Costa hatutan, Ministériu promove nafatin grupu feto sira iha indústria tais hahú estabelese ona sentru inkubadora hodi hadi’a sira-nia negósiu iha indústria tais.

“Tanba haree ba poténsia tais iha Timór kuaze munisípiu hotu iha falta de’it atu dezenvolve sai indústria”, Antónia dehan.

Liga ba kompañia ne’ebé tenta halo ona printing tais, ministériu sei haree imprensaun ne’e. “Keta halo nia iha impaktu ba ekonomia povu nian. Ida ne’e mak ita sei estuda, sé nia printing ne’e kobre ema hira iha Timór. Bele halo evolusaun ba feto Timór, atu halo serbisu iha indústia tais ne’ebé kria ne’e ka la’e? Pontu pozitivu no negativu iha ne’ebé? Tantu ita bele haree mós keta halo ema atu halakon tiha ita-nia karaterístiku ho valór kulturál”, António haktenik.

Tanba indústria ne’ebé MKIA dezenvolve ne’e iha nia valór kulturál nafatin tanba iha tais klásiku nafatin, nia motivu labele muda no prezerva nafatin. Enkuantu transformasaun ne’e ho karater tipu ne’ebé iha no halo fali indústria kreativu no aumenta nia valór. (Jornalista : Maria Auxiliadora/Editor: Otelio Ote)

Liafuan ne ' Ebé Relasiona Ho

Husik Komentáriu Ida

Ita-nia diskursu email sei la sai ba públiku. Área ne ' ebé presiza hetan marka ho *


Cancel reply

Comments

comments

Liafuan ne ' Ebé Kontra

Liafuan Ikus

Liafuan Ohin